កូតឌីវ័រ៖ ក្រុមម្ចាស់ផ្ទះកូតឌីវ័រ បានគ្រងជើងឯកពានរង្វាន់បាល់ទាត់ទ្វីបអាហ្វ្រិក African Cup of Nation ២០២៣ ជាលើកទី៣ បន្ទាប់ពីយកឈ្នះក្រុមនីហ្សេរីយ៉ាយ៉ាងតានតឹងក្នុងលទ្ធផល ២-១ ក្នុងវគ្គផ្តាច់ព្រ័ត្រ។ 

ម្ចាស់ជើងឯក ៣សម័យ នីហ្សេរីយ៉ាបានបើកការនាំមុខមុនដោយកីឡាករ Troost-Ekong នៅនាទីទី៣៨ ក្នុងវគ្គទីមួយ ខណៈគ្រាប់បាល់ទាំងពីររបស់ក្រុមម្ចាស់ផ្ទះកូតឌីវ័រ វាយបកបានសម្រេចដោយកីឡាករ Franck Kessie របស់ក្លិប Al Ahli នៅនាទីទី៦២ និងគ្រាប់បាល់ជ័យជម្នះរបស់ខ្សែប្រយុទ្ធ Dortmund កីឡាករ Sebastien Haller នៅនាទីទី៨១។

គួរបញ្ជាក់ថា ក្រុមទាំងពីរក៏ធ្លាប់ជួបគ្នាម្តងរួចមកហើយនៅក្នុងវគ្គចែកពូល ដែលកាលណោះនីហ្សេរីយ៉ា ឈ្នះម្ចាស់ផ្ទះកូតឌីវ័រ ១-០។

សូមបញ្ជាក់ថា ការគ្រងជើងឯកពានរង្វាន់ African Cup of Nation ២០២៣ របស់កូតឌីវ័រនៅលើទឹកដីរបស់ខ្លួននេះ គឺជាការឈ្នះពានរង្វាន់ជើងឯកទ្វីបអាហ្វ្រិកនេះជាលើកទី៣ បន្ទាប់ពីឈ្នះពាននេះជាលើកដំបូងនៅឆ្នាំ១៩៩២ នៅទឹកដីសេណេហ្គាល់ និងលើកទី២នៅឆ្នាំ២០១៥ នៅទឹកដីអេក្វាទ័រហ្គីណេ។ កូតឌីវ័របានក្លាយជាក្រុមម្ចាស់ផ្ទះដែលឈ្នះពានលើទឹកដីខ្លួននៅឆ្នាំ២០២៤ នេះដូចគ្នាទៅនឹងកាតាដែលទើបឈ្នះពាន AFC Asian Cup ២០២៣ នៅលើទឹកដីរបស់ខ្លួនផងដែរ៕